Компанијата Aether Diamonds (Етер Дајмондс), стартап компанија основана во 2018 година, стана првиот производител во светот кој користи атмосферски јаглерод диоксид за да создаде дијаманти на одржлив начин.
Според Етер, секој продаден карат е еднаков на 20 метрички тони ЦО2 земен од атмосферата, користејќи мешавина од директно зафаќање на воздухот и други методи за отстранување на јаглеродот кои вклучуваат долгорочна секвестрација на јаглерод.
Директното земање на воздухот беше дел од мисијата на Етер од самиот почеток. Основачите Шерман и Војно ја формираа компанијата откако прочитаа за директно зафаќање воздух во 2018 година и бараа начин да создадат вештачки дијаманти користејќи јаглерод извлечен од воздухот. Нивната цел отсекогаш била да продадат доволно дијаманти за да го поддржат пазарот за директно зафаќање воздух.
Компанијата произведе „стотици карати“ дијаманти минатата година и почна да ги испорачува своите први дијаманти до клиентите во средината на 2021 година. Сега, Aether планира да произведе илјадници карати во 2022 година.
Како се произведуваат дијамантите од емисиите на ЦО2?
Етер го започнува процесот на производство на дијаманти со купување на јаглерод диоксид од објектот Climeworks, водечка фирма за директно зафаќање воздух со седиште во Швајцарија, и го пренесуваа во САД. Етер го користи купениот ЦО2 преку сопствен процес и го претвора во метан со висока чистота или CH4. Тој метан потоа директно се вбризгува во дијамантските реактори, каде што методот на хемиско таложење на пареа се користи за создавање на груб дијамантски материјал за неколку недели. Процесот на хемиско таложење на пареа ги загрева гасовите до многу високи температури во услови на речиси вакуум кои трошат големи количини на енергија. Притоа, хемиското таложење на пареа и другите фази на производство на Етер се напојуваат исклучиво од извори на енергија без јаглерод, како што се соларните и нуклеарните извори на енергија.
Одгледаните дијаманти се испорачуваат во Сурат, Индија, каде што се сечат и полираат, а потоа се испраќаат назад во дијамантскиот кварт во Њујорк на продажба.